Gjermanët festojnë fitoren e Botërorit në sheshin e Berlinit (FOTO-LAJM)

Update-Rreth 500 mijë gjermanë kanë “pushtuar” sheshin e Berlinit sot për të festuar së bashku me kombëtaren trofeun botëror. I pari që e mori fjalën ishte trajneri i kombëtares Joakim Lëv, i cili, duke iu drejtuar tifozëve, tha: “Jemi të gjithë kampionë të Botës”.

Gjermania është kthyer në majën e botës 24 vjet pas suksesit në Italia ’90. Lëv nuk e fsheh emocionin e tij: “Ishte një rrugë e gjatë, e vështirë, por skuadra donte të fitonte. Falënderoj tifozët gjermanë, jemi të gjithë kampionë të Botës”.

12:07- Me mijëra tifozë gjermanë kanë rrethuar mëngjesin e sotëm aeroportin kryesor të kryeqytetit për të pritur heronjtë e tyre. Avioni i kombëtares gjermane me kampionët e rinj të Botës në bord zbarkoi në Berlin rreth orës 9:30 të mëngjesit.

Ndërsa me qindra mijëra prisnin në portën e “Brandeburgut”, simbol i bashkimit të dy Gjermanive pas rënies së murit të Berlinit, për të festuar me përfaqësuesen e tyre. I pari që doli nga avioni ishte kapiteni Filip Lahm me trofeun ndër duar, i ndjekur nga Bastian Schweinsteiger që ishte mbuluar me flamurin e vendit të tij dhe kishte lyer fytyrën me ngjyrat e flamurit.

Të gjithë lojtarët u vendosën fillimisht në një pod të improvizuar brenda aeroportit me Kupën e Botës në krye ku dhanë dhe disa intervista për mediat përpara se të niseshin për t’iu bashkuar festës së tifozëve të tyre, e cila po vazhdon ende në këto momente në Berlin. /albeu.com/





Shtuar më 15/07/2014, ora 15:07
Shkruani komentin tuaj!
Të fundit nga kjo kategori