Didier Drogba, sulmuesi i Galatasaray, ka treguar për mediat turke se brenda një muaji ka kuptuar se Fatih Terim ka ngjashmëri shumë të mëdha me Jose Mourinhon, rivalin e skuadrës turke në Champions League.

"Mourinhon e kam si babanë tim. Ai ka një vend të veçantë në jetën time, pasi ma ndryshoi krejtësisht atë. Kam shumë kujtime nga Mourinho. Shpesh te Chelsea shënoja dy gola në ndeshje, por kur nuk shënoja më thoshte të rrija i qetë, sepse shpesh edhe pa shënuar mund të isha lojtari më i mirë i ndeshjes", është shprehur sulmuesi afrikan.

Sipas Drogba, krahasimi mes Mourinhos dhe Terim është shumë i goditur, pasi ngjashmëritë janë shumë të mëdha mes këtyre dy trajnerëve. "Mourinho sforcohet për të nxjerrë maksimumin nga cilido lojtar. Kjo është një nga pikat ku Terim ngjan shumë me të. Ai është shumë afër lojtarëve dhe flet gjithmonë me ne. Faktori psikologjik është shumë i rëndësishëm në futboll dhe në këtë aspekt Terim është jashtëzakonisht i kujdesshëm, deklaroi Didier Drogba. /albeu.com/