Kombëtarja vazhdon përgatitjet për Francën
Kombëtarja Shqiptare ka hyrë në fazën kulminante të përgatitjeve në kuadër të ndeshjes kundër Francës.

Djemtë e drejtuar nga Gianni De Biasi zbritën në fushën e qëndrës stërvitore në Perros Guirec sot paraqite për seancën e parë stërvitore të së hënës.

Ishte parashikuar që skuadra të zbriste në fushë në orën 10:00 të paradites por trajneri De Biasi dhe lojtarët zbritën në fushën e blertë me 30 minuta vonesë.

Fillimisht skuadra iu nënshtrua disa ushtrimeve të lehta fizike. Trajneri qëndroi në çdo moment pranë lojtarëve duke vëzhguar çdo detaj në prag të ndeshjes vendimtare kundër Francës. De Biasi u shfaq në humor dhe nuk i kurseu batutat ndaj lojtarëve, ndërsa Lorik Cana ishte lojtari që si gjithmonë u duk më i karikuar edhe pse nuk do të zbresë në “Velodrome” për shkak të kartonit të kuq të marrë kundër Zvicrës.

Pjesa tjetër e skuadrës ishte e plotë me përjashtim të mesfushorit Ergys Kaçe, i cili u stërvit i diferencuar.

Nga stafi i kombëtares nuk jepet asnjë informacion rreth gjendjes së mesfushorit që pritet të luajë titullar në Marsejë.

Seanca e paradites do të shoqërohet edhe nga ajo e pasdites në orën 17:30 për t’u dhënë fund përgatitjeve në Perros Guirec pasi të martën në orën 11:00 skuadra do të niset drejt Marsejës për takimin e së mërkurës në mbrëmje.

Ndërkohë, në bazë të asaj çfarë është parë në stërvitje pritet që kundër Francës, De Biasi të bëjë ndryshime ku titullar pritet të luajnë Memushaj, Kaçe e Lila.
Shtuar më 13/06/2016, ora 12:51
Shkruani komentin tuaj!
Të fundit nga kjo kategori