Ishte në zyrat e Bayern Leverkusen, dështon në minutat e fundit transferimi i Rashicës
Milot Rashica do të qëndrojë te Verder Bremen të paktën deri në janarin e vitit 2021 pasi transferimi i tij në një tjetër klub të Bundesligës ka dështuar në minutat e fundit.

Lojtrai dukej se ishte pranë firmës me Bajer Leverkusen, por ora 19:00, kur mbyllej merkato në Gjermani, e ka gjetur atë pjesë të Verder Bremen… në zyrat e Bajer Leverkusen.

Mediat gjermane raportojnë se lojtari kishte udhëtuar sot në Leverkusen për të kryer testet fizike para se të gjehej gjuha e përbashkët mes palëve. Futbollisti kishte arritur marrëveshjen personale me Bajer Leverkusen dhe tashmë priste në zyrat e këtij klubi që të bëhej e njëjta gjë me Verder Bremen, për të zyrtarizuar kalimin.

Por sipas “Bild”, marrëveshja ka dështuar në minutat e fundit pasi klubet nuk kanë gjetur gjuhën e përbashkët. Leverkusen kërkonte të huazonte lojtarin me të drejtë blerje dhe ka insistuar deri në fund për këtë mënyrë transferimi. Nga ana tjetër, Verder Bremen kërkonte të siguronte të ardhura sa më të rëndësishme nga ky transferim, duke synuar që ta bënte menjëherë përfundimtare lëvizjen e Rashicës drejt skuadrës tjetër.

Negociatat kanë vazhduar deri në momentet e mbylljes së merkatos, pa gjetur një akord dhe duke bërë që si përfundim, Rashica t’u shtërngonte duart zyrtarëve të Bajer Leverkusen, duke u lënë takim për të ardhmen, ndoshta që në janar, meqë mbetej për momentin ende pjesë e Verder Bremen.
Shtuar më 05/10/2020, ora 19:47
Shkruani komentin tuaj!
Të fundit nga kjo kategori