Atletico Madridi ka arritur të dalë nga San Siro me fitore, ku e mposhti Milanin me një gol të vetëm, në përballjen e parë 1/8 në Champions League.

Ekipi mysafir e dominoi lojën në minutat e para, ndërkohë që Rossonerët përpiqeshin ta largojnë rrezikun duke luajtur me topa të gjatë.

Mirëpo, me kalimin e minutave, vendasit filluan të bëheshin të rrezikshëm dhe e detyruan portierin mysafir që të ndërhynte në disa raste.

Pikërisht falë Courtois, Los Rojiblancos e mbajtën rrjetin të paprekur. Por, edhe lojtarët e Atleticos nuk e linin të qetë mbrojtjen e Milanit. Sido që të jetë, skuadrat shkuan në pushim me rrjeta të paprekura.

Ngjashëm si në fillim të pjesës së parë, edhe në minutat e para të gjysmës së dytë, lojtarët mysafirë ishin më të rrezikshëm. Megjithatë, shumë shpejtë loja u baraspeshua.

Kur po afroheshin njëzet minutat e fundit të sfidës, të dy trajnerët diktuan lojë më të vëmendshme të përqendruar në mesfushë, në mënyrë që të mos rrezikonin pësimin e golave.

Megjithatë, pas një harkimi nga këndi, Diego Costa reagoi më së miri për të shënuar për epërsinë e klubit nga kryeqyteti spanjoll (83’).

Rezultati i përballjes së parë e favorizon Atletico Madridin për t’u kualifikuar në çerekfinale, kur dihet se ndeshjen e kthimit e zhvillon në Vicente Calderon. Mirëpo, nuk duhet të harrojmë se Milani ka histori në Ligën e Kampionëve dhe gjithçka mund të ndodhë.