Sulmuesi anglez, Wayne Rooney, ka nënshkruar kontratë të re pesë vjeçare e gjysmë me Manchester United, ka konfirmuar klubi anglez.

Ka pasur spekulime se Rooney është pajtuar të rinovojë për një kontratë prej 300 mijë funtesh në javë dhe ashtu edhe ndodhi, teksa Rooneyt i është garantuar në kontratën e re se do të bëhet ambasador i klubit kur të pensionohet.

“Unë jam bërë për të qëndruar te United”.

“Në gusht më bëhen 10 vjet në klub dhe gjatë kohës kam pasur momente fantastike, me lojtarë me të cilët kam ëndërruar të luaj”.

“Tani kam rastin që të jem një prej lojtarëve seniorë dhe që mund t’i ndihmoj lojtarëve të rinj. Tifozët gjithmonë kanë qenë pjesë e madhe e këtij klubi dhe përkrahja e tyre ka qenë fantastike. Jam shumë falënderues tek te gjithë tifozët e United anë e mbanë botës për përkrahjen e vazhdueshme”.

“Unë jam shumë i ngazëllyer të jem pjesë e të ardhmes së këtij klubi dhe dua të falënderoj David Moyes për besimin e përkrahjen ndaj meje. Unë jam i bindur se është një kapitull i ri në historinë e Manchester United”, ka deklaruar Rooney me rastin e rinovimit.