U mbajt peng në mal i zhveshur, gjendet nga familjarët 28 vjeçari

Jetmir Rudi nga fshati Rud i Malishevës, ditën e shtunë u raportua se ishte zhdukur. Familjarët e tij kishin lajmëruar rastin në polici, ku edhe kishin kërkuar ndihmë për gjetjen e 28-vjeçarit.

Dyshohet se Jetmir Rudi është rrëmbyer, pasi nga fotot e dërguara në redaksinë e TV Malisheva, 28-vjeçari shihet i lidhur dhe i shtrirë në tokë pothuajse i zhveshur. Ai është gjetur nga familjarët e tij të dielën rreth orës 18:00.

28-vjeçari, për 25 orë nuk u bë i gjallë për familjarët, të cilët raportuan rastin në polici, ata në mëngjesin e kësaj të diele nisën kërkimet bashkë me policinë në zonat rreth fshatit Rud të Malishevës.

Pikërisht në këtë fshat ai u gjet, gjithnjë sipas familjarëve në gjendje të mirë shëndetësore, por pak i shqetësuar.

Njëri nga të afërmit e tij ka treguar për “Klan Kosova” se ata dhe policët e kishin kërkuar në të njëjtën rrugë Jetmirin gjatë tërë ditës, por ai nuk ishte parë nga familjarët, prandaj dyshojnë se dikush e ka sjellë më vonë aty.

Ndërkohë zyrtarët policorë nuk kanë arritur akoma ta intervistojnë Jetmir Rudin për të mësuar nëse ai vërtetë është rrëmbyer dhe detajet tjera nga zhdukja e tij. Aktualisht ai është duke u trajtuar në QKUK.
Shtuar më 23/11/2020, ora 09:11
Shkruani komentin tuaj!
Të fundit nga kjo kategori