Kohë më parë Luiz Felipe Scolari deklaroi se gjëja e keqe e vetme në jetën e Ronaldos është Lionel Messi dhe nëse argjentinasi nuk do të ishte, atëherë Ronaldo për shumë vite me radhë do të ishte më i miri në botë.

Pas kësaj deklarate, tashmë sytë janë kthyer nga familja e Ronaldos, e cila sipas gojëdhënave në Portugali, synon t'a çojë në gjykatë çështjen e ditëlindjes së birit të tyre, Cristiano Ronaldo.

Sipas mediave portugeze, familja e Ronaldos do të kërkojë ndryshimin e ditëlindjes së Ronaldos nga 5 shkurt 1985, në 5 shkurt 1995 me arsyetimin se punonjësi i gjendjes civile e kishte shënuar gabimisht numrin "8" në vend të "9". Sipas mitologjisë së fisit Cristi nga Portugali, të cili i përket vet Ronaldo, njeriu plaket sipas datës së lindjes të regjistruar në gjendje civile, kështuqë ky ndryshim do i zgjaste karrierën futbollistike Ronaldos edhe pasi Messi të jetë larguar nga futbolli.

"Llafet e Dynjasë" ka arritur të mësojë se edhe Real Madridi ka shprehur mbështetjen për iniciativën e familjes së Ronaldos, pasi ky ndryshim do i mundësonte futbollistit të tyre të superpaguar, të bëhej më i miri në botë dhe të fitonte edhe Topin e Artë, pasi Messi të ishte plakur dhe kështu do të eliminohej edhe e keqja e vetme që ka Ronaldo, të jetuarit në të njëjtën kohë me Messin, gjë të cilin e zbuloi kohë më parë trajneri i njohur Scolari. /albeu.com/

SHËNIM: Lajmet në "Llafet e Dynjasë" nuk janë të vërteta. Ato janë trajtime përqeshëse të fenomeneve dhe ngjarjeve të zakonshme.