Menjëherë sapo është njohur me masën ndëshkimore të Komisionit të Disiplinës Sportive pranë FSHF-së, deputeti Partisë Socialiste për zonën e Mallakastrës, Piro Lutaj, ka reaguar për këtë ngjarje. Ai e quan të paprecedentë dhunën që ka ndodhur në ndeshjen kundër Laçit, ndërsa i del në krah skuadrës në çdo hap.

Deputeti Lutaj thotë se është kundër çdo vendimi të tejkaluar që është marrë në dëm të Bylisit dhe të gjithë krahinës së Mallakastrës.

Ndërsa si mallakastriot, zoti Lutaj e dënon dhunën që ka ndodhur.

"Jam kundër çdo ndëshkimi të tejkaluar. Nëse është tejkaluar masa e ndëshkimit, ekipi i Bylisit me të gjitha hallkat e tij do të ketë mbështetjen time në çdo kohë dhe në çdo vend. Do të doja që kjo të mos ndodhte kurrë me Bylisin, pasi është krenaria e atij qyteti dhe i vetmi argëtim për atë zonë të vogël. Theksoj se do të jem në mbështetje të Bylisit. Për sa i përket ndeshjes së fundit, unë nuk kam qenë, vetëm çfarë kam dëgjuar nëpërmjet medias. Ajo që ka ndodhur është ngjarje e paprecedentë në Mallakastër dhe e dënueshme edhe nga opinioni mallakastriot", është shprehur për Panorama-Sport deputeti i qarkut të Fierit. /albeu.com/