Asnjë fitore në 4 ndeshjet e fundit për Napolin, tifozët vërshëllejnë skuadrën pas ndeshjes
Thellohet edhe më tej kriza te Napoli, që mbrëmjen e sotme nuk shkoi më shumë se një barazim pa gola në sfidën përballë Genoas në stadiumin "San Paolo", me tifozët që në përfundim të takimit nuk i kursyen vërshëllimat për të besuarit e Carlo Ancelottit.

Pas një jave të tensionuar, të shkaktuar nga rezultatet negative të javëve të fundit, që kulmuan me revoltën e lojtarëve ndaj presidentit të klubit dhe refuzimin e urdhrit të tij për të qëndruar të grumbulluar deri mbrëmjen e sotme.

Sfida në "San Paolo" nisi e vrullshme për vendasit, që arritën të shënojnë shpejt, por goli i Insignes u anulua për një pozicion jashtë loje në nisje të aksionit, ndërsa gjatë 90-minutave të besuarit e Ancelottit shpërdoruan mundësi të shumta për gol.

Edhe Genoa zbriti disa herë rrezikshëm, duke i shkuar pranë golit veçanërisht me Pinamontin, por një ndërhyrje vendimtare e Koulibaly ruajti të paprekur kuadratin e portës së Napolit, që gjithsesi dështoi të fitojë në të katërtën ndeshje me radhë.

Me tre barazime dhe një humbje në 4 javët e fundit, Napoli shkon vetëm në kuotën e 19 pikëve dhe shikon që të jetë plot 12 pikë larg kreut, shifër kjo që mund të rritet nëse Juventus do të mposhtë Milanin nesër dhe ëndrra titull duket e venitur tashmë.
Shtuar më 10/11/2019, ora 08:26
Shkruani komentin tuaj!
Të fundit nga kjo kategori