Costa: Ndaj Realit vetëm për fitore
Humbja shokuese me Osasunan në La Liga është kthyer shumë shpejt në një ngjarje që i përket të shkuarës për Diego Costan, kryegolashënuesin e Atletico Madrid, i cili ndërkohë pohon se skuadra e tij për asnjë moment nuk është vetëkandiduar si pretendente për titullin.

"Çdo ndeshje e luajmë si një finale. Rezultati i fundit nuk është aspak i mirë për ne, prandaj derbi i të Dielës është tepër i rëndësishëm. E dimë se duhet të fitojmë që të vazhdojmë luftën për titullin", është shprehur Costa.

Në derbin e Madridit, që luhet këtë fundjavë, bomberi i "Los Colchoneros" nuk beson se Reali do të ndiejë peshën nga takimi që do të ketë më parë në Champions me Schalke 04.

"S’besoj se do të jetë kështu. Reali është Real dhe të gjithë e dinë që është një skuadër e madhe. Po, është e vërtetë që ne kemi një javë të qetë përpara, ndërsa ata kanë një ndeshje të rëndësishme. Nëse do të humbasim në derbi, atëherë do ta kemi edhe më të vështirë luftën për titullin. Do ta luajmë këtë ndeshje sikur të jetë e fundit", vijoi Diego Costa.

Për miqësoren me Italinë, Diego Costa shpreson që emri i tij të jetë pjesë e listës së Vincente Del Bosques, ndërsa theksoi edhe njëherë se zgjedhja për të luajtur me Spanjën ishte një vendim totalisht personal. /albeu.com/
Shtuar më 24/02/2014, ora 18:25
Shkruani komentin tuaj!
Të fundit nga kjo kategori