Ende nuk ka akord, Ibra mungon në grumbullimin e skuadrës së Milanit
Pas një mbylljeje fantastike që i bënë një sezoni të çuditshëm si ky i këtij viti, Milani do të rikthehet nesër në fushë për të nisur përgatitjet për vitin e ardhshëm futbollistik, ku Stefano Pioli ka marrë një konfirmim plotësisht të merituar për të qëndruar në krye të pankinës.

Megjithatë mungesa e madhe në Milanello nesër do të jetë simboli i ndryshimit për mirë te Milani, Zlatan Ibrahimovic, i cili pavarësisht 39 viteve mbi supe, përdori gjithë karizmën dhe eksperiencën e tij për të rikthyer kuqezinjtë te rezultatet pozitive.

Te Milani të gjithë duan t’i rinovojnë bashkëpunimin gjigantit suedez edhe për sezonin e ardhshëm, por palët nuk kanë gjetur ende akordin për pagën që Ibra do të fitojë dhe firma mbi kontratë nuk ka ardhur ende, ndaj sulmuesi mund të vijojë edhe disa ditë pushimet.

Gjithsesi në Milanello të gjithë janë optimistë se marrëveshja e re do të firmoset shumë shpejt, pasi palët janë vetëm një milionë euro larg njëra-tjetrës, me sulmuesin që kërkon 7 milionë euro në sezon dhe Milanin që ofron 5 milionë euro plus bonuset, për të shkuar në një shifër prej 6 milionë eurosh.
Shtuar më 24/08/2020, ora 10:54
Shkruani komentin tuaj!
Të fundit nga kjo kategori