Chelsea ka pësuar humbje të rëndë me rezultat 3-1 nga Atletico Madridi në Stamford Bridge, me madrilenët që do të kualifikohen historikisht në finalen e Champions Leagues.

Atmosferë fantastike mbizotëroi në Stamford Bridge, me Mourinhon që inkuadroi atë që ishte formacioni më i fortë. Torres startoi, bashkë me Hazardin e Ivanovicin.

Në fillim të sfidës, Koke rrezikoi për mysafirët, me një krosim që shkoi drejt portës dhe për pak sa nuk e befasoi portierin Schwarzer, mirëpo topi u përplas për shtylle.

David Luiz ka mundur të shënojë një gol spektakolar për vendasit, mirëpo goditja e tij përfundoi shumë pranë shtyllës.

Dhe pas një angazhimi të Azpilicuetas, Fernando Torres i shënoi ish-klubit të tij (36’) dhe natyrisht nuk e festoi golin.

Mirëpo, pas presionit të madrilenëve, Adrian reagoi për mrekulli në zonë për ta barazuar rezultatin (44’).

Pjesa e dytë filloi në mënyrë të zjarrtë. Chelsea filloi me dominim në pjesën e dytë, duke rrezikuar në mënyrë të vazhduar portën.

Mungesa e portierit Petr Cech u tregua vendimtare në këtë pjesw.

Në minutën e 60-të ishte Eto'o ai që ndërhyri ndaj Diego Costas dhe që rezultoi me një penalti për Atleticon, të cilën e konkretizoi pa ndonjë problem Diego Costa.

Në vazhdim Chelsea i vuri të gjitha forcat në sulm, e kjo i konvenoi Atleticos që me kundërsulme e vulosi lojën.

Pas një aksioni të rrezikshëm të mysafirëve, te vendi u gjend konkret turku Arda Turan, i cili realizoi në portën e rezervistit Schwarzer, dhe që vulosi edhe fatin e takimit (72'). Arda Turan në lot, ashtu sikurse tifozët e Chelseat që s'mund të besonin atë që po u ndodhte në territorin e tyre.

Deri në fund Chelsea u hodh në sulm dhe Atletico u mbrojt mirë. Madje Los Rojiblancos patën mundësinë që të thellojnë epërsinë e tyre fenomenale në udhëtim, duke rrezikuar edhe disa herë me Koken dhe Turan.

Me këtë fitore Atletico Madridi siguron në mënyrë historike finalen, duke befasuar të gjithë me fitoren e arritur në Londër, teksa për Chelsean e Mourinhos ka mbetur vetëm Premier League në lojë, e as kjo nuk është e sigurtë.


Finalja e Championsit, Real Madrid – Atletico Madrid zhvillohet më 24 maj, në Lisbonë të Portugalisë.