Finalja e Kupës së Italisë, sot Atalanta dhe Lazio diskutojnë trofeun
Kupa e Italisë do të njohë mbrëmjen e sotme kampionin për sezonin 2018-2019, teksa në stadiumin “Olimpico” të Romës, do të përballen finalistet Atalanta dhe Lazio.

Dy skuadrat kanë arritur me meritë deri në finale, pasi bergamaskët kanë eliminuar me radhë Cagliarin, Juventusin dhe Fiorentinën, ndërsa Lazio ka nxjerrë jashtë kompeticionit Novarën, Interin dhe Milanin.

Atalanta është duke bërë një sezon spektakolar dhe përveçse në finale të Kupës, thuajse ka siguruar një vend në Europa League dhe po luan fort për një vend në zonën Champions, për edicionin e ardhshëm.

Nga ana tjetër, Lazio ka komplikuar rrugën për në Europa League dhe shikon pikërisht Kupën e Italisë, si një dritare për të marrë pjesë në garat europiane sezonin e ardhshëm dhe për të mos “hedhur në kosh” këtë sezon.

Sfida e nesërme do të startojë në orën 20:45 dhe do të gjykohet nga arbitri Luca Banti, ndërsa të gjithë shqiptarët mund ta ndjekin live në ekranin e Supersport 2.
Shtuar më 15/05/2019, ora 08:21
Shkruani komentin tuaj!
Të fundit nga kjo kategori