Bota e futbollit po drejtohet gjithnjë e më shumë drejt biznesit dhe marketingu ka dalë në plan të parë për klubet.

Madje edhe duke ndryshuar stemat e tyre, të cilat prej vitesh me radhë kanë qenë simboli i një skuadre.

Një hap të tillë e mori Juventusi, që nën drejtimin e Anjelit hoqi dorë nga stema e vjetër, për të sjellë një tjetër më moderne dhe më të thjeshtë në modelim. E gjitha kjo vetëm për qëllime marketingu dhe për të shtuar të ardhurat në arkat e tyre.

E një shembull të tillë po e ndjek edhe Interi. Pavarësisht se u përfol edhe për ndryshimin e emrit, ai do të qendrojë po i njëjtë, “F.C. Internazionale Milano“, ndërsa për qëllimin e ndërtimit të një marke botërore, do të përdoret Inter Milano.

Mediat italiane zbulojnë se kompania Suning, që zotëron aksionet e klubit, po punon prej muajsh për ndërtimin e simbolit të tyre të ri, që pritet të jetë gati në përvjetorin e krijimit të skuadër, më 9 mars.

Gërmat F dhe C nuk do të jenë më pjesë e stemës së re, ndërsa në të do të shënohen I dhe M, si dhe do të përfshihen elemente të qytetit të Milanos, si një shenjë e ruajtjes së identitetit për Interin. Qiellgërvishtëset Porta Nuova dhe City Life do të jenë pjesë e këtij dizajni të ri. /Sport Ekspres/