Përplasjet Robben-Guardiola për penalltitë te Bayern Munchen do t’i shikojmë sërish këtë sezon. Kështu mendon kapiteni i skuadrës që fitoi Champions League-n në vitin 2001, Stefan Effenberg. Në një intervistë për "SportBild", legjenda e Bayern-it tha se një çështje e tillë nuk është mbyllur ende dhe do të shkaktojë sërish polemika. Guardiola e pengoi hollandezin që të ekzekutonte 11-metërshin në ndeshjen me Mainz 05. Spanjolli urdhëroi që penalltinë ta ekzekutonte Muller dhe ashtu ndodhi, ndërsa hollandezi e dorëzoi topin i acaruar.

"Robben u ndje i poshtëruar për atë që ndodhi brenda 3 sekondave, përpara 70 mijë tifozëve në stadium. Nuk ishte rezultati 0-0, por 3-1, kështu që holandezi u ndje disi i fyer pasi mori topin dhe shkoi te pika e penalltisë", shprehet Effenberg.

Javën pasardhëse, në ndeshjen e Champions League kundër Viktoria Plzen, Robben fitoi 11-metërshin e golit të parë, dhe ndërsa trajneri i bënte me shenjë që ta ekzekutonte holandezi, ai nuk pranoi duke ia dorëzuar topin Ribery-së.

"Ajo që ndodhi me Plzen-in ishte një përgjigje e qartë e hatërmbetjes ndaj veprimit të trajnerit në ndeshjen me Maincin. Unë e mirëkuptoj gjestin e lojtarit. Jam shumë kurioz për të parë se si do të rrjedhin ngjarjet në të ardhmen", shtoi ish mesfushori i Bayern Munchen, i cili është i mendimit se Robben nuk e ka harruar ende incidentin dhe po pret zhvillime të tjera në pjesën e mbetur të sezonit.

Një gjë të tillë e pohoi dhe vetë Ribery pak ditë më parë. "Robben është ende i zemëruar me trajnerin", është shprehur francezi. /albeu.com/