Probleme te kombëtarja e Egjiptit.

Sipas spanjolles AS, disa lojtarë të përfaqësueses kanë mbetur të pakënaqur nga vendimi i trajnerit për t'ia dhënë shiritin e kapitenit yllit të Liverpool-it, Mohamed Salah.

Një pjesë e skuadrës, në fakt, do që shiriti t'i shkojë mbrojtësit të Al-Ahly, Ahmed Fathi, i cili konsiderohet si lojtari më i përshtatshëm për të përfaqësuar Egjiptin.

Kjo përçarje, gjithmonë sipas AS, është shkaktuar edhe nga qëndrimi kritik që ka patur Salah kundrejt federatës egjiptiane në kohët e fundit, por edhe nga shfaqjet e tij publike, siç ka qenë ajo në kopertinën e revistës GQ, që ka krijuar shumë polemika në Egjipt.

Gjithsesi, trajneri beson se zgjedhja më e mirë është që t'ia besojë shiritin lojtarit më të talentuar për ta bërë të lumtur dhe për ta motivuar të japë maksimumin në fushën e lojës.