Interi po bën çdo përpjekje që të mund të blejë yllin e Corinthians, Paulinho, por kjo ka për të qenë e vështirë. "Është më e lehtë që kjo marrëveshje të bëhet në qershor sesa tani. Nuk është çështje parash, por impenjimesh të vetë futbollistit", u shpreh presidenti zikaltër, Massimo Moratti.

Edhe nga Brazili vjen lajmi, nga vetë Drejtori Teknik i klubit brazilian, i cili saktëson se mesfushori do të vazhdojë të jetë pjesë e ekipit. "Nuk ka mundësi që ai të ikë tani, kështu që jemi të qetë", deklaroi Duilio Alves.

Për më tepër, duket e komplikuar që lojtari të bindet të heqë dorë nga Kupa Libertadores e radhës me skuadrën e tij. Duket se talenti brazilian ka një dëshirë të madhe që të luajë me klubin para se të transferohet në Europë.

Gjithsesi, ai nuk është aspak kundër kalimit tek Interi në verë, atëherë kur do të përfundojnë të gjithë objektivat me Korinthiansin. Ndërkaq drejtori teknik, Marco Branca, ndodhet në Brazil, pasi synimi i tij është që të mbyllë marrëveshjen me lojtarin që ai të transferohet në qershor në Milano. /albeu.com/