Mourinho-kritikëve: Shikoni sa kanë shënuar sulmuesit e mi ndër vite
Pas një dëmtimi që e mbajti për disa muaj jashtë fushave, Harry kane përfitoi nga ndërprerja e kampionatit për shkak të pandemisë dhe rikuperoi për të qenë gati për sprintin final të kampionatit, por në ndeshjen e rikthimit në fushë ndaj Manchester United nuk arriti të lërë gjurmë.

Sulmuesi nuk u shfaq asnjëherë kërcënues për kuadratin e mbrojtur nga spanjolli David De Gea, ndërsa kaq mjaftoi që disa analistë në Angli të shprehen se për kapitenin e Anglisë do të jetë e vështirë që të shënojë 25-30 golasezon, me Mourinhon në pankinë.

I menjëhershëm ka qenë edhe reagimi i portugezit, që në deklaratën për mediat angleze ka sjellë në kujtesën e të gjithëve disa emra futbollistësh që kanë shënuar shumë gola ndërkohë që stërviteshin nga ai.

"Kam pasur disa sulmues që kanë luajtur për mua dhe nuk kanë shënuar pak. Njëri luan te Juventusi dhe për 3 sezone që e stërvita te Reali, shënoi 168 gola, ose 56 gola për sezon. Një tjetër quhej Diego Milito dhe në një sezon me mua shënoi 30 gola, duke fituar edhe 3 tituj. Kam pasur Karim Benzema që në tre sezone, ndonëse nuk ishte titullar i padiskutueshëm, ka shënuar 78 gola, ose 26 për sezon. Mos harroni edhe Ibrahimovic, që në një sezon e gjysmë nën drejtimin tim, ka shënuar 58 gola, ose 29 për sezon. Kur ia kanë dalë këta, nuk ka asnjë pengesë që të njëjtat shifra t’i përsërisë edhe Kane. Ishte thjesht ndeshja e tij e parë pas 6 muajsh mungesë, ndaj nuk ishte në një ditë të mirë, por shumë shpejt do të shihni të shënojë shumë", deklaroi portugezi.
Shtuar më 23/06/2020, ora 09:18
Shkruani komentin tuaj!
Të fundit nga kjo kategori