Napoli do të përballet në 1/8-at e Championsit me realin e Madridit. Një përballje e veçantë për Hysajn, i cili do të përballet me Cristiano Ronaldon.

Zëvendëstrajneri i përfaqësueses shqiptare, Paolo Tramezzani është i bindur se mbrojtësi kuqezi do të tregojë të gjitha vlerat e tij përballë yllit portugez.

Por për ta ilustruar këtë besim, ai ka zgjedhur shembullin më të gabuar të mundshëm. “Hysaj është përballur me Ronaldon në kualifikueset e Europianit. Atëherë u tregua i aftë, pasi arriti ta kufizonte dhe shpresoj që kjo të ndodhë përsëri”, janë fjalët e Tramezzanit për “Radio Kiss Kiss Napoli”.

Duket se zëvendëstrajneri i përfaqësueses shqiptare ka harruar se Hysaj dhe Ronaldo nuk janë ndeshur asnjëherë në fushën e lojës me kombëtaren, pasi njëri apo tjetri, munguan në përballjet mes Shqipërisë dhe Portugalisë në eliminatoret e Europianit.

Në ndeshjen e parë, ku Hysaj ishte titullar dhe ku Shqipëria fitoi me rezultatin 1-0 në transfertë, Ronaldo u la pushim nga trajneri i atëhershëm i Portugalisë, Paulo Bento e kësisoj, mbrojtësi nuk e kishte si kundërshtar në fushë.

Në takimin e kthimit në Elbasan, ishte radha e Hysajt të mungonte për shkak të një dëmtimi. Kësisoj, Ronaldo kishte si kundërshtar direkt Gjimshitin në atë ndeshje të cilën portugezët e fituan po me rezultatin 1-0.