Në Egjipt kanë filluar të ëndërrojnë të shohin një bashkëkombas të tyre të luaje me Real Madrid.

Bëhet fjalë për Muhammad Salah.

Presidenti i Federatës së Egjiptit, Hany Abo Rida, ka thënë se gjatë verës Real Madridi do të bëjë ofertë për sulmuesin pasi e dëshiron në "Santiago Bernabeu" një lojtar të kalibrit të 25 vjeçarit.

Salah u transferua te Liverpooli nga Roma për 34.4 milionë paund verën e kaluar. Ai ka shkëlqyer në Premierligë, duke shënuar 18 gola në 22 ndeshje.

"Real Madrid do të bëjë ofertë për Salah në verë", u shpreh Rida.

"Salah është duke shikuar që të përmirësojë lojën e tij. Është e qartë se nëse një lojtar egjiptian luan për një klub aq të popullarizuar në botë siç është Real Madridi, do të ishte fantastike për futbollin egjiptian", shtoi numri një i Federatës së Futbollit të Egjiptit.