Trajneri i kombëtares ruse, Fabio Capello flet mbi aktualitetin e futbollit spanjoll duke mos lënë pa përmëndur edhe kalimin e Fernando Torres tek Atletico Madrid. Sipas tij, rikthimi tek "Los Colchoneros" është vendimi më i mirë që lojtari mund të merrte për karrierën e tij.

"Torres ka gjithçka që i nevojitet një futbollisti, por i mungon goli. Ka patur momente ku ka shkëlqyer por ka nevojë të rifitojë besimin dhe të luajë si në kohën kur aktivizohej me Atleticon ose Liverpoolin. Simeone do të nxjerrë në pah aftesitë e tij. Nuk është problem taktike por besimi, ndaj unë jam i sigurt se tek Atletico do të shohim Fernandon më të mirë", ka thënë italiani.

Capello bëri një koment edhe për Real Madrid, skuadër që e cilëson si më të mirën e kontinentit.

"Lojtarët e Realit do të shënojnë epokën e tyre. Kanë një mbrojtje të pakalueshme, një mesfushë fantastike dhe një sulm që shënon sikur të ishin duke bërë shëtitje në park. Ky ekip është i madh falë punës që ka bërë Ancelotti, i cili ka përdorur taktikën e duhur tek Reali. Më pëlqen menyra se si u del në krah gjithmonë lojtarëve duke i mbrojtur nga presioni i jashtëm", vijoi Capello.

Shpesh herë Reali i Ancelottit është krahasuar me Barcelonën e rekordeve të Pep Guardiolas por Capello mendon se janë dy ekipe krejt të ndryshme.

"Nuk mund t'i krahasosh. Barcelona kishte 6 apo 7 lojtarë nga të rinjtë e klubit ndërsa Reali ka ndërtuar skuadrën që ka sot falë Florentino Perezit i cili më blerjet e tij ka qëlluar gjithnjë në shenjë", ka thënë "Don" Fabio.


Përsa i përket Champions League 2014/15, 68-vjeçari ka preferencat e tij: Real Madrid eshte favoriti numër një dhe më pas vjen Chelsea e Bayern Munchen". /lbeu.com/