Rekordi më i fundit i Barcelonës
Barcelona ka treguar në vitet e fundit se është skuadra që luan futbollin më spektakolar dhe dominues. Katalanasit vazhdojnë të mahnisin me rekordet e jashtëzakonshme që vendosin herë pas here duke hyrë në histori si një nga ekipet më të mira të të gjitha kohërave. Me ndeshjen e fundit në kampionat, katalanasit kanë dhuruar një rekord tjetër, duke regjistruar ndeshjen e 300-të zyrtare radhazi në të cilën ata arrijnë të sigurojnë mbajtjen më të lartë të topit gjatë 90 minutave.

Tiki-taka e famshme e katalanasve është bërë objekt diskutimi prej shumë vitesh në botën e futbollit, por pakkush kishte menduar se sa kohë ka që kjo mënyrë loje është treguar efikase për t’i dhënë avantazhin kësaj skuadre. Sipas statistikave të ofruara nga vetë klubi spanjoll, hera e fundit që nuk kanë pasur mbajtjen e topit në një ndeshje ka qenë në 7 majin e vitit 2008, kur Real Madrid i mori zotërimin e topit me 50.5% përkundrejt 49.5% të katalanasve.

Në total bëhet fjalë për 185 ndeshje kampionati spanjoll, 62 në Ligën e Kampioneve, 39 në Kupën e Mbretit, 8 në Superkupën e Spanjës, 4 në Botërorin për Klube dhe 2 në Superkupën e Evropës.

Duke pasur parasysh se filozofia e tiki-taka vazhdon të mbizotërojë në klubin Katalanas dhe për disa vite të tjera protagonistët do të jenë të njëjtët, atëherë është e imagjinueshme që shifra 400 ndeshje radhazi me zotërimin e topit, mund të vijë shumë shpejt. Kjo është thjeshtë normale për një skuadër që në vite e ka treguar një nivel shumë të lartë futbolli. /albeu.com/
Shtuar më 16/04/2013, ora 13:00
Shkruani komentin tuaj!
Të fundit nga kjo kategori