Sinan Idrizi: Kasano refuzoi Flamurtarin në verë
Antonio Kasano ka qenë në planet e Flamurtarit që në merkaton e verës, fakt të cilin e ka zbuluar vetë administrator i Flamurtarit Sinan Idrizi.

Idrizi ka konfirmuar bisedimet me sulmuesin italian që në verë. “Antonio Kasano ka qenë në bisedime me ne që në verë. Pra ka qenë në planet tona”, shkruan Panorama.

Ndërkaq, në rrjetet sociale dje ka qarkulluar një lajm se Antonio Kasano ka qenë dje në Tiranë për t’u takuar me Idrizin. I pyetur për këtë, administratori i Flamurtarit u shpreh. “Unë jam në Tiranë sot (dje), por jo për t’u takuar me Kasanon”.

E ndërsa gjasat që Kasano të vijë në Vlorë janë të pakta, numri një i klubit vlonjat thotë se ylli i Flamurtarit mund të jetë një tjetër. “Klubi është në diskutime me dy-tre lojtarë, yje të kalibrit të lartë.

Ne jemi në bisedime me emra të mëdhenj që nuk kanë ardhur ndonjëherë në Shqipëri dhe nuk ka kush t’i sjellë tjetër veç nesh. Jemi në bisedime me një lojtar shumë të kuotuar në treg, por nuk mund të zbuloj emra. Janë lojtarë që është ëndërr që t’i kesh në skuadër dhe nuk e di nëse do të pranojnë të vijnë, ndaj nuk dua që të nxitohem. Jemi në bisedime”, tha Idrizi.

Merkato

Administratori tha dje se gjatë merkatos së janarit ekipi do të përforcohet me katër lojtarë cilësorë. Tre do të jenë të huaj, ndërsa mësohet se klubi ka hyrë në bisedime edhe me një lojtar kosovar. Ky i fundit mësohet se është mbrojtës. Lojtari i parë, me të cilin është arritur akordi, është mbrojtësi argjentinas Ezekuiel Misheli, por ende nuk është bërë publik.

Mësohet se klubi është në kërkim të tre mbrojtësve dhe një sulmuesi.
“Do të hyjmë në merkato për katër lojtarë. Jemi në bisedime me disa lojtarë. Duam mbrojtës dhe sulmues. Do të bëjmë afrime cilësore. Lojtarët do të na afrohen në fazën përgatitore që do ta zhvillojmë në Antalia. Do të ketë surpriza”, theksoi Idrizi./albeu.com/

Shtuar më 06/01/2017, ora 11:03
Shkruani komentin tuaj!
Të fundit nga kjo kategori