Diego Armando Maradona i bën një analizë Spanjës së Del Bosques, duke e pranuar se dominanca e futbollit iberik në hartën botërore është e dukshme.

Trajneri i Al Wasl beson se La Roja e meritoi titullin kampion pas dominimit në Euro 2012. "Asnjë lojtar nuk mundi ta mposhtte makinerinë spanjolle. Cristiano Ronaldo e provoi me Portugalinë, ndërsa Spanja e çoi në muze. Një gjë të tillë e provoi edhe Pirlo por nuk preku top me këmbë", thekson Maradona në një intervistë për gazetën "Times of India".

Legjenda argjentinase nuk ngurron ta drejtojë gishtin e suksesit në drejtim të mbrojtjes, duke theksuar se me Iker Casillas në portë, e Alvaro Arbeloa, Gerard Pique dhe Sergio Ramos përpara tij, Spanja blindoi repartin difensiv.

"Jordi Alba tregoi gjithashtu se Barcelona nuk i shpenzoi më kot 14 milionë euro. Gjithsesi, Xavi, Sergi Busquets, Xabi Alonso, Andres Iniesta dhe David Silva treguan se Spanja di të punojë si një makinë. Nëse ndalon njërin, tjetri vjen pas teje dhe të preson", shton Maradona duke nënvizuar se Spanja po revolucionarizon futbollin duke luajtur pa sulmues. /albeu.com/