Stam te Milan, De Boer: Do luftojmë ta mbajmë
Ish mbrojtësi Jaap Stam përflitet si kandidat për të plotësuar stafin e Clarence Seedorf te Milani, por trajneri i Ajaxit, Frank de Boer, insiston se klubi i tij do të bëjë çmos që ta bllokojë nisjen e tij drejt Italisë. Madje De Boer shprehet se Ajaxi do të ishte i vdekur, nëse humbet një prej asistentëve të tij më të besuar.

"Kam dëgjuar se Milani është i interesuar për Jaap Stam. Nuk duam që të largohet sepse kemi investuar shumë tek ai. Nëse kuqezinjtë e duan vërtetë dhe ai gjithashtu dëshiron të shkojë, atëherë po, ndoshta ka një mundësi që të largohet. Gjithsesi gjatë këtij sezoni nuk mund të shkëputet prej nesh, për më tepër që ka një kontratë deri në 2016-ën", u shpreh tekniku i Ajax.

Ndërkohë, De Boer, ish shok skuadre i Seedorf, kur të dy luanin për Ajaxin dhe kombëtaren holandeze, deklaroi mbështetjen e tij për vendimin e 37-vjeçarit për të nisur karrierën si trajner në një prej klubeve ikonë të futbollit botëror.

"Nëse Clarence mendon se është gati, atëherë duhet të vazhdojë në këtë rrugë. E di që ai nuk bën asgjë pa e menduar mirë më parë, pra besoj se është gati. Seedorf është nga ata njerëz që e di se çfarë kërkon në lojë", përfundoi De Boer. /albeu.com/
Shtuar më 18/01/2014, ora 12:57
Shkruani komentin tuaj!
Të fundit nga kjo kategori