Me dy gola të shënuar në dy ndeshjet e para të këtij sezoni, Luis Suarez dëshmoi se sa i rëndësishëm është për Liverpoolin, që synon të rikthehet në mesin e katër ekipeve të para në Premierligë.

Edhe pse nisi nga stoli, uruguaiani Suarez ishte ai që së bashku me Meirelesin i dhanë shpirt lojës së Liverpoolit, në derbin e javës së dytë të kampionatit anglez, kundër Arsenalit.

Pikërisht pas bashkëpunimit me Meirelesin, Suarez shënoi në minutën e fundit të ndeshjes për të vulosur fitoren kundër Arsenalit në Londër (2:0).

"Ishim zëvendësime shumë të qëlluara. Nuk po them se Andy Carroll apo Dirk Kuyt luajtën keq, por Suarez ishte fantastik. Po ashtu edhe Meireles u tregua shumë i mirë", ka thënë trajneri i Liverpoolit, Kenny Dalglish.

Dalglish kundër Arsenalit startoi me vetëm një sulmues, anglezin Carroll. Por ishte zëvendësuesi i tij, Suarez, ai që inspiroi ekipin dhe e udhëhoqi atë drejt fitores.

Suarez u transferua te Liverpooli në janarin e këtij viti nga skuadra holandeze Ajax. Liverpooli ka paguar dëmshpërblim prej 25 milionë eurosh për të. /albeu.com/