Valon Berisha: Jam shumë i lumtur që kam firmosur për Lazion
Valon Berisha tashmë zyrtarisht është pjesë e klubit italian të Lazios, që ka konfirmuar transferimin e tij nëpërmjet një komunikate ditën e sotme.

Mesfushori 25-vjeçar i Kombëtares së Kosovës kaloi me sukses të gjitha testet mjekësore dhe firmosi për 4 sezone me bardhekaltrit.

Në fjalët e para si futbollist i Lazios, ai shprehu lumturinë e këtij transferimi, ndërsa nuk harroi të falënderojë edhe klubin austriak të Salzburgut.

"Jam ndier shumë mirë te Salzburgu, ku kam fituar shumë trofe dhe kam njohur shumë njerëz fantastikë. Momenti më i bukur ishte kualifikimi në gjysmëfinale të Europa League", tha fillimisht ai.

"Kishte ardhur momenti për të hedhur një tjetër hap, ndaj firmosa për Lazion, sepse është pjesë e një prej kampionateve më të mira në Europë. Salzburgu, gjithsesi, do të mbetet pjesë e rëndësishme e karrierës sime. Jam shumë i lumtur që kam firmosur për Lazion. Çfarë dite për mua dhe familjen time!. Kush do ta kishte besuar se një fëmijë nga një qytet i Norvegjisë (Egersund) do të mbërrinte në një qytet të madh të Italisë (Romë). Ëndrrat u bënë realitet. Po pres me padurim të takoj shokët e mi të rinj. Tani nis një punë e vështirë. Forca Lazio!", deklaroi Valon Berisha. /albeu.com/
Shtuar më 03/07/2018, ora 19:55
Shkruani komentin tuaj!
Të fundit nga kjo kategori