Zyrat Shëndetësore Lokale në Itali kanë krijuar një kaos pasditen e djeshme, pasi kanë urdhëruar izolim në mirëbesim të të gjithë futbollistëve të skuadrave që kanë pasur nga një të infektuar nga Covid-19 gjatë ditëve të fundit.

Kjo përkthehet në bllokimin e grumbullimit me kombëtaret të futbollistëve që janë pjesë e skuadrave si Roma, Fiorentina, Interi, etj., ndërsa grupi prej 41 futbollistësh që Roberto Mancini kishte vendosur të thërrasë për ndeshjet e nëntorit te Italia, ka nisur të tkurret ndjeshëm.

Kështu në një komunikatë të shpërndarë nga Federata Italiane e Futbollit, 18 futbollistë kanë udhëtuar drejt Covercianos që mbrëmjen e djeshme, ndërsa të martën pritet t’u bashkohen edhe 11 të tjerë.

Gjithsesi mbetet ende e paqartë situata për 10 futbollistë të tjerë, pjesë të skuadrave si Interi, Roma, Lazio e Fiorentina, të cilët sipas komunikatës së ASL-ve lokale do të duhet të futen në izolim.

Lojtarët që kanë mbërritur mbrëmë në Coverciano – Belotti, Bernardeschi, Calabria, Cragno, Criscito, Di Lorenzo, El Shaaraëy, Emerson, Gagliardini, Grifo, Lasagna, Orsolini, Pellegri, Luca Pellegrini, Pessina, Sirigu, Soriano e Tonali.

Lojtarët që pritet t’i bashkohen grupit të martën – Bonucci, Chiesa, Donnarumma, Florenzi, Insigne, Jorginho, Kean e Meret, Berardi, Caputo, Locatelli.

Lojtarët e bllokuar nga vendimi i ASL-ve: Acerbi, Barella, Biraghi, Castrovilli, Cristante, D’Ambrosio, Immobile, Mancini, Lorenzo Pellegrini

Lojtarë të dëmtuar apo në dyshim – Ogbonna, Romagnoli, Spinazzola

Italia do të luajë një sfidë miqësore me Estoninë të mërkurën në mbrëmje, ndërsa më pas dy ndeshje të Ligës së Kombeve përballë Polonisë dhe Bosnjës, teksa dy sfidat e para do t’i luajë në shtëpi, ndërsa të fundit në transfertë në Sarajevë.

Kujtojmë që edhe trajneri i Italisë, Roberto Mancini nuk do të jetë në grumbullim, pasi ka rezultuar pozitiv ndaj Covid-19 dhe është vendosur në izolim, por mund t’i bashkohet skuadrës nëse arrin të mposhtë në kohë koronavirusin.