Miami, Federer dhe Haas në gjysëmfinale
Tommy Haas dhe David Ferrer janë kualifikuar për në gjysmëfinalet e turneut të Miami, ndërsa do të përballen mes tyre në raundin e parafundit të turneut prestigjoz të tenisit për meshkuj. Tenisti gjerman mundi në ndeshjen e tij 2-0 me sete (6-3, 6-1) francezin Giolles Simon. Një tjetër paraqitje spektakolare e tenistit 34-vjeçar, i cili në çerekfinale dhuroi surprizën më të madhe të turneut amerikan, duke eliminuar numrin një të botës dhe favoritin kryesor për të fituar titullin kampion, Novak Djokovic.

Haas u përball me rezistencën e kundërshtarit të tij vetëm në setin e parë, ndërsa në të dytin do të dominonte duke i lejuar vetëm një gejm francezit. Pas këtij suksesi dhe padyshim fitores së dy ditëve më parë ndaj Djokovic e vendosin tenistin gjerman në listën e favoritëve për të fituar titullin kampion, bashkë me kundërshtarin e ardhshëm në gjysmëfinalet e turneut të Miami, David Ferrer.

Edhe spanjolli konfirmoi formën e tij të shkëlqyer duke mundur 2-1 me sete (4-6, 6-3,6-0) austriakun Jurgen Melzer. Ky i fundit surprizoi në setin e parë, por më pas vuajti rikthimin e Ferrer në lojën e tij më të mirë, duke u dorëzuar përballë tenistit spanjoll që mban vendin e pestë në klasifikimin e përgjithshëm botëror.

Përballja e Ferrer me Haas në gjysmëfinale do të jetë përcaktuese, ndërsa fituesi me shumë mundësi do të jetë rivali i Andy Murrey, i cili pas eliminimit të Djokovic është favoriti kryesor për të fituar titullin kampion. /albeu.com/
Shtuar më 28/03/2013, ora 13:44
Shkruani komentin tuaj!
Të fundit nga kjo kategori