As rikthimi me gol që në ndeshjen e parë zyrtare pas dëmtimit të rëndë i Radamel Falcaos nuk i mjaftoi, Monacos për të marrë qoftë edhe një pikë në takimin përmbyllës të javës së parë në kampionatin francez, pasi skuadra e principatës u mposht brenda në stadiumin “Luigji i dytë”, 2-1 nga Lorient. Largimi i James Rodriguez për te Reali i Madridit, binte shumë në sy te Monaco pasi skuadra e drejtuar nga trajneri Leonardo Jardim ishte pa fantazi në fushën lojës, për më tepër që tekniku portugez e nisi sfidën me Falcaon në stol.

Pa kaluar ende 9 minuta lojë, qendërmbrojtësi i vendasve Abdennour pengoi brenda zone sulmuesin kameruanas të Lorient Vincent Aboubakar. Arbitri kryesor nuk kishte asnjë dyshim duke akorduar një 11-metërsh. Nga pika e bardhë e penalltisë Aboubakar nuk gaboi duke kaluar miqtë në avantazh. Duke parë që skuadra e tij nuk po reagonte aspak në minutën e 59-të trajneri Jardim hodhi në fushë "El Tigre"-n në vend të Ocampos.

Pas vetëm 19 minutash në tapetin e gjelbërt, Falcaos iu dha mundësia për të shënuar sërish me fanellën e Monacos në një ndeshje zyrtare pasi sulmuesi bullgar Dimitar Berbatov arriti të fitonte një 11-metërsh.

Nga pika e bardhë Falcao mposhti portierin e Lorient me një goditje vërtet të zgjuar duke barazuar rezultatin. Megjithatë nuk ishte e thënë që Monaco të merrte qoftë edhe një pikë në këtë sfidë pasi Lavgine në minutën e 87-të kaloi sërish skuadrën e trajnerit Sylvain Ripoll në avantazh, duke bërë që sfida të mbyllej me fitoren e miqve. /albeu.com/