VAR kthehet në problem në Spanjë, trajneri i Levantes: Do anuloheshin 50 mijë gola kështu (VIDEO)
Levante u ndal në një barazim 1-1 kundër Celta Vigo në shtëpi, ndërkohë që në minutat shtesë skuadrës nga Valencia iu anulua një gol që sigurisht do të hapë polemika në Spanjë. Dani Gomez e dërgoi topin në rrjetë, ndërkohë që arbitri e pa aksionin në VAR dhe mori vendimin që ta anulonte golin.

Te Levante u tërbuan pas vendimit të marrë. Pamjet filmike tregojnë se është një vendim shumë i dyshimtë, pasi lojtari i skuadrës vendase nuk ishte në rreze të portierit. Madje "gardiani" i Celta Vigo e preku pak topin, që u ndal më pas në rrjetë.

Pas ndeshjes ka folur edhe trajneri i Levante, Paco Lopez, i cili nuk arrin të gjejë dot një shpjegim për vendimin e marrë nga arbitri për golin e anuluar në shtesë. "Pavarësisht se sa herë e shohim atë rast, askush nuk mund ta shpjegojë pse e kanë anuluar. Nëse kanë thirrur nga VAR, atëherë…

U dhashë një shpjegim të rregullores dhe duket se ata kanë urdhrin për ta anuluar golin. Mendoj se me këtë mënyrë mund të anulohen 50 mijë gola. Nuk e kuptoj shpjegimin, as duke i parë pamjet”, u shpreh Lopez në konferencë shtypi.

Më pas ai shtoi: "Këmbëngul sërish, duke parë pamjet është e vërtetë që Roger është në pozicion jashtë loje. Ajo që duhet të shihni është nëse ndërhyn në vizionin e portierin. Aty shohim momentin e goditjes. Ajo që unë nuk kuptoj është pse e thërrasin nga VAR-i".

Shtuar më 27/10/2020, ora 11:30
Shkruani komentin tuaj!
Të fundit nga kjo kategori